അമ്പിയാക്കള്‍ക്കുണ്ടാകുന്ന മുഅ്ജിസത്തുകളൊക്കെ [ പ്രത്യേകമായ മുഅ ജിസത്ത് ഒഴികെ] ഔലിയാക്കള്‍ക്ക് കറാമത്തായി ഉണ്ടാകാമെന്നാണ് പണ്ഢിത മതം. വളരെ ചെറിയ ഒരു ന്യൂനപക്ഷം ഇതില്‍ ഭിന്നാഭിപ്രായം രേഖപ്പെടുത്തിയിട്ടുണ്ടെങ്കിലും അത് തികച്ചും ബാലിശമായ അഭിപ്രായമാണെന്നും ബഹുഭൂരിപക്ഷം പണ്ഢിതന്മാരും മുഅ്ജിസത്തുകളൊക്കെ കറാമത്തായി ഉണ്ടാകുമെന്ന അഭിപ്രായക്കാരാണെന്നും ഇമാമുല്‍ ഹറമൈനി(റ) തന്റെ അല്‍ ഇര്‍ശാദിലും ഇമാം അബൂനസ്വ്ര്‍(റ) തന്റെ അല്‍ മുര്‍ശിദിലും ഇമാം നവവി(റ) തന്റെ ശറഹു മുസ്ലിമിലും പറഞ്ഞിട്ടുണ്ട്. (ഫതാവല്‍ ഹദീസിയ്യ, പേജ് 108) ശറഹുല്‍ ഫിഖ്ഹില്‍ അക്ബര്‍, പേജ് 63).