ഐക്യസംഘം കൊണ്ടുവന്നതും കൊണ്ടുപോയതും !

മക്തിതങ്ങൾ, വക്കംമൗലവി തുടങ്ങിയവർ ഉയർത്തിക്കൊണ്ടുവന്ന നവോഥാന മൂല്യങ്ങളെ കേരള മുസ്ലിം ഐക്യസംഘം അതിന്റെ പൂർണതയിൽ എത്തിച്ചുവെന്നാണ് ഇപ്പോൾ ചിലർ പറയുന്നത്. മുസ്ലിം സമുദായത്തെ മതപരമായും സാമൂഹികമായും വിദ്യാഭ്യാസ പരമായും ഈ സംഘം പത്തുവർഷം കൊണ്ടു പരിവർത്തിപ്പിച്ചുകളഞ്ഞുവത്രെ! നേരാണോ? എങ്കിൽ ആ ചരിത്രം കൂലങ്കുശമായി തന്നെ ഒന്നു പരിശോധിക്കണമല്ലോ.

എന്തായിരുന്നു ഐക്യസംഘം, എന്തിനായിരുന്നു ഐക്യസംഘം,  ആരായിരുന്നു ഈ സംഘത്തിന്റെ അവതാരകർ?
കൊടുങ്ങല്ലൂർ_ ഏറിയാട് ദേശങ്ങളിലെ മണപ്പാടന്മാർ, നമ്പൂരിവീട്ടുകാർ, പുത്തൻവീട്ടുകാർ, കാര്യേഴത്തുകാർ തുടങ്ങിയ  അതിസമ്പന്നരായ ചില മുസ്ലിം പ്രമാണിമാരും മലബാർ കലാപം കത്തിപ്പടർന്നപ്പോൾ തെക്കോട്ട് ഓടിരക്ഷപ്പെട്ട കെ എം മൗലവി, ഇ കെ മൗലവി, മാഹിൻ ഹമദാനി തുടങ്ങിയ ചില മൗലവിമാരും ചേർന്നാണ്  ഏറിയാട്ട് വച്ച് 1922ൽ ഐക്യസംഘം രൂപീകരിക്കുന്നത്. സംഘത്തിലെ ഈ രണ്ടു പക്ഷത്തിനും രണ്ടുതരം താത്പര്യങ്ങളാണ് ഉണ്ടായിരുന്നത്.

മുസ്ലിം പ്രാമാണിമാർക്ക്  സാമ്പത്തിക താത്പര്യങ്ങളുണ്ടായിരുന്നു -പലിശ 'ഹലാലാ'യിക്കിട്ടിയല്ലോ! പ്രമാണിത്തവും ആഡ്യത്വവും പ്രദർശിപ്പിക്കാനുള്ള വേദികളായിരുന്നു മറ്റൊരുദ്ദേശ്യം. ഐക്യസംഘത്തിന്റെ പത്തു വാർഷികമഹാമേളകൾ ഈ പ്രമാണിത്ത പ്രകടനത്തിന്റെ വേദികളായിരുന്നു. വക്കംമൗലവി ഈജിപ്തിൽ നിന്നു കട്ടുകടത്തിക്കൊണ്ടുവന്ന മതയുക്തിവാദം എന്നു പറയാവുന്ന ഈജിപ്ഷ്യൻ സലഫിസം പ്രചരിപ്പിക്കുകയായിരുന്നു മൗലവിമാരുടെ ലക്ഷ്യം.  ഈ രണ്ടു തത്പരകക്ഷികൾ ചേർന്നു ഐക്യസംഘത്തെ പത്തു വർഷക്കാലം
ഉത്സവമാക്കി എന്നു പറഞ്ഞാൽ പച്ചനേരാണ്. അതിലപ്പുറം വല്ല നവോഥാനവും മുസ്ലിം സമുദായത്തിൽ ഐക്യസംഘക്കാർ നടത്തിയോ എന്നാണു പരിശോധിക്കേണ്ടത്.

മൂന്നു തലത്തിൽ സമുദായത്തെ പരിവർത്തിപ്പിച്ചുവെന്നാണല്ലൊ പറയുന്നത് -
1) മതപരം,
2) സാമൂഹികം,
3) വിദ്യാഭ്യാസപരം.
ഇതിൽ ഒന്നാമത്തേതാണ് അടിസ്ഥാനപരം. എന്തായിരുന്നു ഐക്യസംഘത്തിന്റെ മതപരമായ അജണ്ട? സംഘത്തിന്റെ ചരിത്രത്തിൽ നിന്നു തന്നെ നമുക്കതു വായിക്കാം.
1923ൽ വക്കം മൗലവിയുടെ അധ്യക്ഷതയിൽ ഏറിയിട്ടു ചേർന്ന ഒന്നാം സമ്മേളനത്തിന്റെ ഒന്നാം പ്രമേയം ഇങ്ങനെ:

    "....ആ സമ്മേളനത്തിൽവച്ചു കൊടികുത്ത്, ചന്ദനക്കുടം തുടങ്ങിയ അനാചാരങ്ങൾ മുസ്ലിംകൾ നടത്തരുതെന്ന പ്രമേയം ഐകകണ്ഠേന പാസാക്കി."
           (കെഎം മൗലവി ജീവചരിത്രം. പുറം: 145)
     ''ഖബറാരാധനയെ (ഖബ്ർ സിയാറത്ത്) ശക്തിയുക്തം എതിർത്തുകൊണ്ടാണ് ഐക്യ സംഘം രംഗത്തു വന്നത്."
             (ശബാബ് വാരിക. വാ:32, ല:32)
      "കേരള മുസ് ലിംകൾക്കിടയിൽ ഉണ്ടായിരുന്ന ചന്ദനക്കുടം പള്ളിയിലേക്കു കൊണ്ടുപോകൽ, കൊടിയേറ്റം തുടങ്ങിയ അനാചാരങ്ങളെ ധ്വംസിക്കാനായിരുന്നു ഐക്യസംഘം പ്രവർത്തിച്ചിരുന്നത്. ഇവർക്ക് പ്രചോദനം നൽകിയിരുന്നത് അറേബ്യയിലെ നജ്ദി അബ്ദുൽവഹാബിന്റെ നേതൃത്വത്തിൽ ഉണ്ടായ മുസ്ലിം നവീകരണ പ്രസ്ഥാനമായിരുന്നു."
   (മുഹമ്മദ് അബ്ദുറഹ്മാൻ ജീവചരിത്രം. പു:267)
     "അറേബ്യയിലെ ഇബ്നു അബ്ദിൽവഹാബ്, ഈജിപ്തിലെ മുഹമ്മദ് അബ്ദു, റശീദ് രിള  തുടങ്ങിയ പരിഷ്കർത്താക്കളുടെ പാതയാണ് ഐക്യസംഘം ഏറെക്കുറെ സ്വീകരിച്ചിരുന്നത്...
ഇബ്നു അബ്ദിൽവഹാബിന്റെ ആശയങ്ങളോടു സദൃശ്യം കണ്ടതിനാൽ എതിരാളികൾ ഐക്യസംഘക്കാരെ'വഹാബിസംഘം' എന്നു വിശേഷിപ്പിക്കുമായിരുന്നു."
             (ശബാബ്. വാ: 32, ല:32)
     "സാധാരണ മുസ്ലിംകൾക്കിടയിൽ കാര്യമായ സ്വാധീനം നേടാൻ അവർക്കു (സംഘത്തിന്) കഴിഞ്ഞില്ല. കാലാകാലങ്ങളിലായി ആചരിച്ചു വന്നിരുന്ന ആചാരാനുഷ്ഠാനങ്ങളെ എതിർത്തുവെന്നതും യാഥാസ്തിക പണ്ഡിതന്മാർക്കു സാധാരണക്കാർക്കിടയിൽ ഉണ്ടായിരുന്ന സ്വാധീനവും ഇതിനു കാരണമായി."
            (ശബാബ്. വാ:32 ല:32)
     " കൊടുങ്ങല്ലൂർക്കാർ അധികവും പ്രമാണിത്തമുള്ള കുംബങ്ങളോ അവരെ ചുറ്റിപ്പറ്റിക്കഴിയുന്ന ആശ്രിത കുംബങ്ങളോ ആയിരുന്നു. നിഷ്പക്ഷ സംഘത്തിന്റെ കാലം മുതൽ തന്നെ സമ്പന്ന കുടുംബങ്ങളെല്ലാം ഇതുമായി സഹകരിച്ചിരുന്നു. അതു കൊണ്ടു തന്നെ ഈ കുടുംബങ്ങൾക്കെതിരെ പ്രവർത്തിക്കാൻ ആ കാലത്ത് ആളുകൾ തയാറായിരുന്നില്ല. പലരുടെ ഉള്ളിലും എതിർപ്പുകൾ ഉണ്ടായിരുന്നു, എന്നാൽ അതു പുറത്തു പറയാൻ വേദികൾ ഉണ്ടായിരുന്നില്ല."
     (ശബാബ്. വാ: 32, ല:32 അഡ്വ.ഹബീബ്     മണപ്പാടുമായുള്ള അഭിമുഖത്തിൽ നിന്ന്)
     '' പ്രസ്ഥാനത്തിനെതിരെ യാഥാസ്ഥിതികർ രംഗത്തെത്തിയെങ്കിലും സാമൂഹികവും സാമ്പത്തികവുമായി മണപ്പാടുള്ള ഔന്നത്യത്തെ സ്നേഹത്തോടെയും ഭയത്തോടെയും
നോക്കിക്കണ്ടിരുന്ന അവർ അമർഷം ഉള്ളിലൊതുക്കി പിൻവലിയാൻ നിർബന്ധിതരായി."
      (ബക്കർ മേത്തല - 2010 ഫെബ്ര.28. തേജസ് വാരാന്തപ്പതിപ്പ്)

ഈ ഉദ്ധരണികളെല്ലാം ഐക്യസംഘത്തിന്റെയും സലഫിസത്തിന്റെയും ആധികാരിക ചരിത്ര രേഖകളിൽ നിന്നാണ്. ഐക്യസംഘം എന്തായിരുന്നുവെന്നും ആരെയാണ് അതു പ്രതിനിധാനം ചെയ്തിരുന്നതെന്നും സമുദായത്തിന്റെ പൊതുധാര എങ്ങനെ അതിനോടു പ്രതികരിച്ചുവെന്നും മേൽ ഉദ്ധരണികളിൽ നിന്നും വ്യക്തമാണ്. കെ.എം മൗലവിയുടെ ജീവചരിത്രം എഴുതിയിരിക്കുന്നത് സലഫി ചരിത്രകാരനായ കെ.കെ മുഹമ്മദ് അബ്ദുൽ കരീമാണ്. 250ൽപ്പരം പേജ് വരുന്ന ഈ പുസ്തകം 1985ൽ, തിരൂരങ്ങാടിയിലെ 'അൽകാത്തിബ് പബ്ലിക്കേഷൻസാണ് പ്രസിദ്ധീകരിച്ചത്. മുഹമ്മദ് അബ്ദുർറഹ്മാന്റെ ജീവചരിത്രമാകട്ടെ ഇതിനേക്കാൾ ആധികാരികമാണ്‌. എൻ പി.മുഹമ്മദും കെ.എ കൊടുങ്ങല്ലൂരും അടങ്ങുന്ന പ്രഗൽഭരായ ടീമാണ് ഇതു തയാറാക്കിയത്. 'ശബാബ്' ഏതാണെന്നു പറയേണ്ടതില്ലല്ലോ -കേരളത്തിലെ സലഫി പ്രസ്ഥാനങ്ങളുടെ ജിഹ്വകളിലൊന്ന്. സുന്നി പക്ഷ ചരിത്രകാരന്മാരെ ഇവിടെ ഉദ്ധരിക്കുന്നേയില്ല.

അപ്പോൾ ഇതാണ് കാര്യം!
ഐക്യസംഘത്തിന്റെ മതനവീകരണ ലക്ഷ്യം കലർപ്പില്ലാത്ത ശുദ്ധ സലഫിസമായിരുന്നു! എന്നാലതങ്ങു നേരെചൊവ്വെ പറഞ്ഞുകൂടായിരുന്നോ? സലഫിസം ഒരു മഹത്തായ ആശയമാണെങ്കിൽ അതിങ്ങനെ കട്ടും ഒളിച്ചും കടത്തണോ?   പുതിയ കാലത്തു മാത്രമല്ല; പഴയ കാലത്തും ഒളിയജണ്ടകളിലൂടെയാണു ലോകത്ത്‌ പലയിടത്തും സലഫിസം കടന്നുകൂടിയത്.

ഐക്യസംഘത്തിന്റെയും സലഫിസത്തിന്റെയും അജണ്ടകളിൽ മേൽപ്പറഞ്ഞതല്ലാത്ത മുഴുത്ത ഇനങ്ങൾ വേറെയുമുണ്ട്. സ്ത്രീ പള്ളിപ്രവേശം, മലയാളം ഖുതബ, നബിദിന - മൗലിദ് വിരോധം, തവസ്സുൽ, ഇസ്തിഗാസ.... ഈ പട്ടിക നീണ്ടതാണ്. കേരളത്തിലെ പാരമ്പര്യ മുസ്ലിം വിശ്വാസികളെ ഒരു നൂറുതവണ നരകത്തിലേക്കു തള്ളാൻ മാത്രം വിഭവശേഷിയുണ്ട് സലഫിസത്തിന്റെ ശിർക്ക് ഭാണ്ഡത്തിന്! എന്നിട്ട് എന്തു സംഭവിച്ച? ഐക്യസംഘത്തിന്റെ പത്തു വർഷം പോകട്ടെ; സലഫിസത്തിന്റെ മൊത്തം തൊണ്ണൂറ് വർഷത്തെ പരിശ്രമം കൊണ്ട്  ഈ അജണ്ടയിൽ പറഞ്ഞ വല്ലതും നടപ്പായോ? ഇവർ എതിർത്തു ഇല്ലാതാക്കാൻ ശ്രമിച്ചതു വല്ലതും ഇല്ലാതായോ? ഞാൻ ഉപന്യസിക്കുന്നില്ല; നവോഥാനം പറയുന്നവരുടെ മുൻകയ്യിൽ അതൊക്കെ ഒരു സോഷ്യൽ ഓഡിറ്റിംഗിനു വിധേയമാക്കട്ടെ!

#സാമൂഹികമാറ്റം.
1922നു മുമ്പും ശേഷവും കേരളത്തിലെ മതസൗഹാർദവും മതസഹിഷ്ണുതയും പരിശോധിച്ചാൽ ഐക്യസംഘം ഉണ്ടാക്കിയ സാമൂഹിക നവോഥാനത്തിന്റെ കഥയറിയാം. ഒരു അമുസ്ലിമിനോടു ചിരിക്കുന്നതു പോലും പാപമായിക്കരുതുന്ന വിദ്വേഷത്തിന്റെ മതമാണു ഐക്യസംഘത്തിലൂടെ സലഫിസം കേരളത്തിനു പഠിപ്പിക്കാൻ ശ്രമിച്ചത്. തെരുവുകളിൽ കലഹിക്കാനുള്ള വിഷയമായി മതത്തെ മാറ്റിയതും ഇസ്ലാം എന്നാൽ ഒരു വലിയ ബഹളമാണെന്ന മോശം സന്ദേശം സമൂഹത്തിനു ലഭിച്ചതും ഐക്യസംഘത്തിന്റെ വരവിനു ശേഷമാണ്.

ഒറ്റ മനസ്സോടെ ഒന്നിച്ചുനിന്നിരുന്ന കേരള മുസ്ലിംകൾക്കിടയിൽ ഭിന്നിപ്പിന്റെ വിഷവിത്ത് പാകിയത് ഐക്യസംഘം എന്നു പേരിട്ട അനൈക്യസംഘത്തിന്റെ വരവോടെയാണ്‌. 22നു മുമ്പ് കേരള മുസ്ലിംകൾക്ക് ഒറ്റ നേതൃത്വമേ ഉണ്ടായിരുന്നുള്ളൂ, ഒരു നാട്ടിൽ ഒറ്റ മഹല്ല് ജമാഅത്ത് മാത്രമേ ഉണ്ടായിരുന്നുള്ളൂ, പള്ളികളും മതപാഠശാലകളും കൂട്ടായ്മകളും ഒന്നേ ഉണ്ടായിരുന്നുള്ളൂ. ഐക്യസംഘത്തിന്റെ വരവോടെ ഈ ഒരുമ തകർന്നു. എന്നാൽ
ഒന്നിപ്പിക്കാൻ വന്നവരുടെ പിൻമുറക്കാർ ഇപ്പോൾ എന്തായി? തൗഹീദ് അപകടത്തിലാണെന്നു പറഞ്ഞു സുന്നികളെ നരകത്തിൽ തള്ളിയവർ അതേ തൗഹീദിനെ ചൊല്ലി പരസ്പരം തല്ലിപ്പിരിഞ്ഞു പലതായി ചിന്നിച്ചിതറുന്നതു കേരളം ലൈവായി കണ്ടു കൊണ്ടിരിക്കുകയാണ്!

#വിദ്യാഭ്യാസവിപ്ലവം?
ഐക്യസംഘം ഉണ്ടാക്കിയ വിദ്യാഭ്യാസ വിപ്ലവം തീർച്ചയായും ചരിത്രപ്രധാനമാണ്. കൊടുങ്ങല്ലൂരിലാണ് തുടക്കമെങ്കിലും കേരളത്തിലുടനീളം സംഘത്തിനു ശാഖകളുണ്ടായിരുന്നു. സമൂഹത്തിലെ സമ്പന്നരും അതിസമ്പന്നരും സംഘത്തിൽ സർവാത്മനാ അണിചേർന്നിരുന്നു. വിദ്യാസമ്പന്നരായ മധ്യവർഗവും ഇതിനൊപ്പം കൈകോർത്തു. അതാടെ സംഘത്തിനു
സാമ്പത്തികമായും സാമൂഹികമായും സുശക്തമായ അടിത്തറയുണ്ടായി. പത്തു വർഷം ഒരു വിദ്യാഭ്യാസ മുന്നേറ്റത്തിനു മതിയായ കാലയളവൊന്നുമല്ല. എന്നാൽ നടേപ്പറഞ്ഞ 'സമുദായത്തിന്റെ നടുക്കഷ്ണ'ത്തിനു ഗംഭീരമായ ഒരു തുടക്കത്തിനു തീർത്തും മതിയായ കാലയളവാണിത്. പണക്കാരും വിദ്യാസമ്പന്നരും പുരോഗമനവാദികളായ മൗലവിമാരും ചേർന്നു പത്തു വർഷം കൊണ്ട്(1922-1933) കേരളത്തിലുണ്ടാക്കിയ വിദ്യാഭ്യാസ പുരോഗതിയുടെ കണക്ക് താഴെ ചേർക്കുന്നു:

    1) LP സ്കൂളുകൾ ---------- O
     2) UP സ്കൂളുകൾ --------- O
     3) ഹൈസ്കൂളുകൾ ------ O
     4) ഡിഗ്രി കോളജുകൾ --- O
     5) പി ജി കോളജുകൾ ---- O
     6) യൂണിവേഴ്സിറ്റികൾ -- O
     7) മതപാഠശാലകൾ ------ O
     8) ഇതിൽ നിന്നെല്ലാം
          പഠിച്ചിറങ്ങിയവർ ------ O

ഈ കണക്കുകളും സംഘത്തിന്റെ ഒദ്യോഗിക ചരിത്രത്തിൽ നിന്നാണ്. ദോഷം തന്നെ പറയരുതല്ലോ - സംഘം നടത്തിയ മഹാകുംഭമേള കളിൽ കൊട്ടക്കണക്കിനു പുരോഗമനാത്മക പ്രമേയങ്ങൾ ഉൽപാദിപ്പിച്ചിട്ടുണ്ട്. ഈ കടലാസുപുലികൾ പുല്ലുതിന്നാതെ പോയത് ആരുടെ കുറ്റം?

#അലീഗമോഡൽ.
 കേരളത്തിലെ മുസ്ലിംകളുടെ വിദ്യാഭ്യാസ ഉന്നമനത്തിനു വേണ്ടി ആലുവയിൽ അലിഗർ മോഡൽ കോളജ് സ്ഥാപിക്കാൻ ഐക്യസംഘത്തിന്റെ ആലുവയിൽ ചേർന്ന രണ്ടാം സമ്മേളനം തീരുമാനിച്ചത് സംഭവമായിരുന്നു. ഇതിനായി പ്രഗൽഭരsങ്ങുന്ന കോളജ് കമ്മറ്റിയും രൂപീകരിച്ചിരുന്നു. ആ കഥ പറയാം:
ഉന്നത വിദ്യാഭ്യാസ സ്ഥാപനങ്ങൾ തുടങ്ങുന്നതിനു സൗജന്യനിരക്കിൽ (ഏക്കർ ഒന്നിനു 1000രൂപ) ഭൂമി അനുവദിക്കുമെന്ന് അക്കാലത്ത് തിരുവിതാംകൂർ രാജകുടുംബം വിളമ്പരം ചെയ്തു. ഇതനുസരിച്ച് ആലുവയിൽ നിന്നു രണ്ട് ടീമുകൾ അപേക് സമർപ്പിച്ചു. മലങ്കര ഓർത്തോഡക്സ് സഭ, സിറിയൻ ചർച്ച്, മാർതോമാ ചർച്ച്, യാക്കോബായ സഭ എന്നീ ക്രിസ്ത്യൻ വിഭാഗങ്ങളുടെ കോൺഫെഡറേഷനായിരുന്നു ഒന്ന്. ഐക്യസംഘത്തിന്റെ 'കേരള മുസ്‌ലിം കോളജ് കമ്മറ്റി'യായിരുന്നു രണ്ടാമത്തേത്. സംഘം 8ഏക്കർ 46സെന്റ് ഭൂമി കൈവശപ്പെടുത്തുകയും ചെയ്തു. പ്രൊഫസർ കെ സി ചാക്കോയുടെയും പ്രൊഫ.എം എ വർക്കിയുടെയും മറ്റും നേതൃത്വത്തിലുള്ള ക്രിസ്ത്യൻ മാനേജ്മെന്റ് ഭൂമി സമ്പാദിച്ചു കോളജും തുടങ്ങി -അതാണു രണ്ടാമതായി ചേർത്ത ഇമേജ് -UC കോളജ് എന്ന 'യൂണിയൻ ക്രിസ്ത്യൻ കോളജ്.' ആലുവയിലെ UC കോളജ് ഇന്ന് കേരളത്തിലെ ഒന്നാംകിട കോളജുകളിൽ ഒന്നാണ്.

ഇനി ഐക്യസംഘത്തിന്റെ 'അലീഗർ മോഡലി'നു എന്തു സംഭവിച്ചു എന്നു നോക്കാം: മൂന്നാമതു ചേർത്ത ഇമേജാണ് ഇപ്പോഴത്തെ ഐക്യസംഘം അലീഗർ മോഡൽ! അതായത്, ആലുവയിൽ അലീഗറും വന്നില്ല ജാമിഅ:മില്ലിയ്യയും വന്നില്ല. ആലുവാ മുനിസിപ്പാലിറ്റിയുടെ വമ്പൻ
വാട്ടർട്രീറ്റ്മെന്റ് പ്ലാന്റ് വന്നു! പിന്നെയും അതായത്, ചാക്കോച്ചനും വർക്കിച്ചനും കോളജ് തുടങ്ങിയപ്പോൾ മണപ്പാടനും സംഘവും കിട്ടിയ ഭൂമി വിറ്റ് പുട്ടടിച്ചു പള്ളി പിടിക്കാൻ പോയി, ഖുതുബ മലയാളമാക്കാൻ ഗുണ്ടകളെ സംഘടിപ്പിക്കാൻ പോയി, മഖ്ബറകൾ ഇടിച്ചു നിരത്താനുള്ള പദ്ധതികൾ ആവിഷ്കരിക്കാൻ പോയി! വിചാരിച്ചിരുന്നെങ്കിൽ, അവരിലെ ഒരൊറ്റ പണക്കാരൻ മതിയായിരുന്നു പത്തോ ആയിരമോ കുട്ടികൾക്കു പഠിക്കാവുന്ന ഒരു പള്ളിക്കൂടം സ്ഥാപിക്കാൻ. എന്തിന്, പത്ത് മഹാമേളൾക്കു വേണ്ടി തുലച്ചുകളഞ്ഞ അനേക ലക്ഷം രൂപ ഉണ്ടായിരുന്നെങ്കിൽ ജില്ലയിൽ ഒന്നു വീതം സംസ്ഥാനമൊട്ടാകെ വിദ്യാലയങ്ങൾ സ്ഥാപിക്കാമായിരുന്നു. വീണ്ടും അതായത് -മുസ്ലിംകളുടെ വിദ്യാഭ്യാസ പുരോഗതിയോ സാമൂഹിക വളർച്ചയോ ഒന്നുമായിരുന്നില്ല ഐക്യസംഘത്തിന്റെ ലക്ഷ്യം, സലഫിസമായിരുന്നു. രാൾ മുറ്റത്തൊരു മാവിൻതൈ നട്ടുപിടിപ്പിക്കുമ്പോൾ അതിൽ നിന്നു ചക്കപ്പഴം കിട്ടണം എന്നു കരുതുകയില്ലല്ലോ,

ഐക്യസംഘവും സലഫിസവും വരുന്നതിനു മുമ്പ് കേരളത്തിലെ മുസ്ലിംകൾക്ക് വിദ്യാഭ്യാസം ലഭിച്ചിരുന്നില്ല, മുസ്ലിം പെൺകുട്ടികൾക്ക് വിദ്യാഭ്യാസം ലഭിച്ചിരുന്നില്ല... എന്നാക്കെ പറഞ്ഞാൽ അതു സലഫിസം വരുന്നതിനു മുമ്പ് കോഴിക്കോട് വിമാനത്താവളമുണ്ടായിരുന്നില്ല, കണ്ണൂരിൽ സർവകലാശാല ഉണ്ടായിരുന്നില്ല എന്നാക്കെ പറയുന്നതുപോലെ എട്ടുകാലി മമ്മുഞ്ഞിത്തരമാണ്.

ഇനി ഈ മമ്മൂഞ്ഞിത്തരത്തിന്റെ വസ്തുത
എന്താണെന്നു നോക്കാം:
1910 കാലത്ത് കേരളത്തിന്റെ സാരക്ഷരതാ നിരക്ക് 10ശതമാനത്തിനും താഴെയായിരുന്നു. അരനൂറ്റാണ്ട് കഴിഞ്ഞു 1951ലെ കണക്കനുസരിച്ച് ഈ നിരക്ക് വളർന്നത് 47.18 ശതമാനം മാത്രം. കേവലം സാക്ഷരതാ നിരക്ക് തന്നെ ഇതാണെങ്കിൽ വിദ്യാഭ്യാസ വളർച്ചയുടെ കഥ പറയാനുണ്ടോ? 1957ൽ വടകരയിൽ വച്ച് എസ് എൻ ഡി പി ക്കാർ ഒരു തിയ്യപെൺകുട്ടിയെ സ്വർണപ്പതക്കം നൽകി ആദരിച്ചുവത്രെ! ആ സമുദായത്തിൽ നിന്നു ആദ്യമായി ഡിഗ്രി പാസായതിനായിരുന്നു ഈ പുരസ്കാരം!
മാതൃഭൂമി വാരികയിൽ ലളിതാംബിക എഴുതിയ ലേഖനം ഓർക്കുന്നു; 1945 കാലത്ത് തിരുവനന്തപുരം യൂണിവേഴ്സിറ്റി കോളജിൽ പഠിക്കുമ്പോൾ അവരുടെ ബാച്ചിലെ 45 കുട്ടികളിൽ ഒരൊറ്റ പിന്നാക്കക്കാരനോ ന്യൂനപക്ഷക്കാരനാ ഉണ്ടായിരുന്നില്ലത്രെ, എല്ലാം ഉപരിവർഗത്തിൽ നിന്നുള്ളവർ! പെൺകുട്ടികൾ മൂന്നോ നാലോ! ഈ സംഭവം പറഞ്ഞപ്പോൾ ആദരണീയനായ പ്രൊഫ.എ.കെ അബ്ദുൽ ഹമീദ് സാഹിബ് അദ്ദേഹത്തിന്റെ അനുഭവം പങ്കുവച്ചു.1975ൽ ഫാറൂഖ് കോളജിലെ അദ്ദേഹത്തിന്റെ BSc കെമിസ്ട്രി ബാച്ചിൽ 48 പേരിൽ മുന്നോ നാലോ പെൺകുട്ടികൾ, ഇപ്പോൾ അദ്ദേഹം പ്രിൻസിപ്പാളായ മർകസ് സയൻസ് കോളജിൽ ഇതേ സയിൻസ്ഗ്രൂപ്പിൽ ആൺകുട്ടികൾ പേരിനു മാത്രം!

അപ്പോൾ അതായിരുന്ന കേരളത്തിലെ അക്കാലത്തെ പൊതുവിദ്യാഭ്യാസത്തിന്റെ അവസ്ഥ. മുസ്ലിംകൾക്ക് എന്നല്ല;ഉപരിവർഗത്തിനല്ലാതെ ആർക്കും വ്യാപകമായി വിദ്യാഭ്യാസം ലഭിച്ചിരുന്നില്ല എന്നതാണു ചരിത്രപരമായ വസ്തുത. മുസ്ലിംകൾ വിദ്യാസപരമായി പിന്നാക്കമായതിനു പിന്നെയും നിരവധി കാരണങ്ങളുണ്ട്. ഈജിപ്തിൽ നിന്നു പുറപ്പെട്ട സലഫിസത്തിന് കേരളത്തിലേക്കുള്ള വണ്ടി വൈകിപ്പോയതാണു കേരളമുസ്ലിംകളുടെ വിദ്യാഭ്യാസ പുരോഗതി പിന്നാക്കമാകാൻ കാരണമായത് എന്ന ചരിത്രപരമായ മണ്ടത്തരമൊന്നും ദയവായി ഇനിയാരും എഴുന്നെള്ളിക്കരുത്.

#എന്തുകൊണ്ട്?
മുസ്ലിം ലീഗിന്റെ കരതലശയ്യയിൽ കിടന്നാണു കേരളത്തിൽ സലഫിസവും മൗദൂദിസവും വളർന്നു തിടംവച്ചത്. തങ്ങൾ ആർജ്ജിച്ച അധികാരവും അവസരങ്ങളും കൗശലപൂർവം സലഫികളുടെ കൈകളിലെത്തിക്കുന്നതിൽ ലീഗ് വിജയിച്ചു. ചില തങ്ങന്മാരെയും മുസ്ലിയാന്മാരെയും മുന്നിൽ നിറുത്തി സുന്നി മുഖ്യധാരയെ സമർത്ഥമായി കബളിപ്പിക്കുന്നതിലും പാർട്ടി വിജയിച്ചു.1989ലെ അട്ടിമറിയിൽ കാര്യങ്ങളെല്ലാം അതിന്റെ ശരിയായ വഴിയിൽ വന്നു. അവസരങ്ങൾ കൈവെള്ളയിൽ എത്തിയതോടെ സുന്നി മുഖ്യധാരയുടെ  കുതിപ്പാരംഭിച്ചു. കാൽനൂറ്റാണ്ടു കൊണ്ട് സുന്നികൾ കണക്കു തീർത്തു. ഇപ്പോൾ അന്തർദേശീയ നിലവാരത്തിൽ വളർന്ന സുന്നി വിദ്യാഭ്യാസ സ്ഥാപനസമുച്ചയങ്ങളിൽ നിന്നുള്ള മിടുക്കന്മാർ സംസ്ഥാനത്തിന്റെയും  ദേശത്തിന്റെയും അതിർത്തികൾ കടന്നു കാംബ്രിഡ്ജ് മുതൽ അൽ അസ്ഹർ വരെയുള്ള ലോകോത്തര സർവകലാശാലകളിൽ എത്തിക്കഴിഞ്ഞിരിക്കുന്നു. ഉപരിപഠനവും തൊഴിലും സേവനവുമായി ആഫ്രിക്കയിലും അമേരിക്കയിലും യൂറോപ്പിലും അവർ സാന്നിധ്യമറിയിക്കുമ്പോൾ നവോഥാനത്തിന്റെ അട്ടിപ്പേറവകാശികളുടെ പുതിയ തലമുറ യമനിലേക്കും അഫ്ഘാനിലേക്കും സിറിയയിലേക്കും ചാവേറുകളാകാൻ ഒളിച്ചോടുകയാണ്, ഈ പുതിയ കാലത്ത് ജിന്നു ബാധയെക്കുറിച്ചും സിഹ്റിലെ തൗഹീദിനെക്കുറിച്ചും തർക്കിച്ചു തലതല്ലിക്കീറുകയാണ്. പുളിക്കലും അരീക്കോടും കുറ്റ്യാടിയും ചേന്ദമംഗല്ലൂരും അസ്തമിച്ചു കഴിഞ്ഞു, പകരം കാരന്തൂരും മലപ്പുറവും ദേളിയും പുതിയ കുറ്റ്യാടിയും ഉദയം ചെയ്തിരിക്കുന്നു. സലഫി നവോഥാനം എന്ന ചാപ്പിള്ളയെക്കുറിച്ച് ദയവായി ഇനിയാരും സംസാരിക്കാതിരിക്കുക.
 
മലപ്പുറം മഅദിൻ അക്കാദമിയിൽ കേരള മുഖ്യമന്ത്രി സഖാവ് പിണറായി വിജയൻ മുസ്ലിം നവോഥാനത്തെക്കുറിച്ചു ദീർഘമായി ഉപന്യസിച്ചപ്പോൾ വേദിക്കു മുമ്പിലെ സീറ്റിലിരുന്നു ആധിയോടെ ഞാൻ ആലോചിച്ചതിങ്ങനെയാണ്:
'വക്കംമൗലവിയും സംഘവും ഉയർത്തിവിട്ട നവോഥാനം യാതൊരു വിഘ്നവും കൂടാതെ അങ്ങനെതന്നെ പുരോഗമിച്ചിരുന്നുവെങ്കിൽ! കേരളത്തിലെ ആദരണീയ ഉലമാക്കൾ ആ മുന്നേറ്റത്തിനു തടയിട്ടില്ലായിരുന്നുവെങ്കിൽ! എന്താകുമായിരുന്നു കേരളത്തിന്റെ അവസ്ഥ? കേരളം ഇന്ന് മറ്റൊരു അഫ്ഘാനോ സിറിയയോ യമനോ ആകമായിരുന്നു, ആഗോള ഭൂപടത്തിൽ സലഫി ടെററിസ്റ്റ് മേഖലകൾ അടയാളപ്പെടുത്തിയാൽ കേരളം ഒന്നാം സ്ഥാനത്തുണ്ടാകുമായിരുന്നു! ഭീകരവാദത്തിനും തീവ്രവാദത്തിനും എതിരായ നടപടികക്കു വേണ്ടി രാജ്യം ഒരുക്കിയ സന്നാഹങ്ങളുടെ ആസ്ഥാനം തിരുവനന്തപുരമോ കൊച്ചിയോ ആകുമാകുമായിരുന്നു! മുസ്ലിം ചെറുപ്പക്കാർ കൂട്ടത്തോടെ ആട് മേയ്ക്കാൻ പോയ കാരണത്താൽ ആൺതുണയറ്റ് പെൺകുട്ടികൾ മൂത്തുനരച്ചുപോകുമായിരുന്നു, ശാന്തരായി തന്നെ ശ്രവിക്കുന്ന, ലക്ഷക്കണക്കിനു മുസ്ലിം വിശ്വാസികൾ അടങ്ങിയ ഇങ്ങനെ ഒരു മഹാസമ്മേനത്തെ അഭിമുഖീകരിക്കാനുള്ള അവസരം തന്നെ കേരളത്തിന്റെ മുഖ്യമന്ത്രിക്ക് ലഭിക്കുമായിരുന്നില്ല!'

എന്നെ അതിശയപ്പെടുത്തിയ മറ്റൊന്നുകൂടിയുണ്ട്;
മാപ്പിളമലബാറിന്റെ തിരുമുറ്റത്ത്, ഒരു മറുപക്ഷത്തിന്റെ ഹൃദയഭൂമികയിൽ, തെരഞ്ഞെടുപ്പ് മാമാങ്കം തലഭാഗത്തു വന്നുനിൽക്കെ ആ സമുദായത്തിന്റെ നേർപാതിയെ മുമ്പിൽ കിട്ടിയിട്ട് ആ അവസരം രാഷ്ട്രീയമായി മുതലെടുക്കാൻ മികച്ച രാഷ്ട്രീയ തന്ത്രജ്ഞനായ സഖാവിനു കഴിയാതെ പോയതെന്ത്?
- OMTharuvana fb post. 19-1-2019