തറാവീഹ് എന്ന പേര് പിൽക്കാലത്തു വന്നതോ?

*തറാവീഹ് എന്ന പേര് പിൽക്കാലത്തു വന്നതോ?*

അബ്ദുല്ലാഹി ശർഖാവി(റ) പറയുന്നു: _ " *തറാവീഹ് എന്നത് തർവീഹത്തിന്റെ ബഹുവചനം* ആണ്. ഒരു പ്രാവശ്യം വിശ്രമിക്കുക എന്നതാണ് ഭാഷാർത്ഥം . ഈ നിസ്കാരത്തിന്റെ നന്നാലു റക്അത്തുകൾക്കിടയിൽ അൽപ സമയം വിശ്രമിക്കാറുണ്ടായിരുന്നതു കൊണ്ടാണ് *ഒരോ നന്നാല് റക്അത്തുകൾക്കു തർവീഹത്ത് എന്ന് പേര് വെക്കപ്പെട്ടത്"*_
( ഫത്‌ഹുൽ മുബ്‌ദി വാള്യം 2 പേ:165 , മുൻജിദ് വാ: 1 പേ:286 )

തർവീഹത്തിന്റെ ബഹുവചനമായ തറാവീഹ് കൊണ്ടുള്ള നാമകരണം ഈ നിസ്കാരത്തിൽ രണ്ടിൽ കൂടുതൽ തർവീഹത്തുകൾ ഉണ്ടെന്നു വ്യക്തമാക്കുന്നു. *അപ്പോൾ ചുരുങ്ങിയത് പന്ത്രണ്ട് റക്അത്തുകളെങ്കിലും വേണം. എട്ട്  റക്അത്തുകൾക്കു തറാവീഹ് എന്ന് നാമകരണം ചെയ്യാൻ ന്യായമില്ല, മറിച്ചു അതിനു 'തർവീഹതാനി' എന്നായിരുന്നു പേര് പറയേണ്ടിയിരുന്നത്.*
ഈ നമസ്കാരത്തിന് *തറാവീഹ് എന്ന നാമം സ്വഹാബത്തിന്റെ കാലഘട്ടത്തിൽ തന്നെ അറിയപ്പെട്ടിരുന്നു.* ഹിജ്‌റ പതിനാലിൽ റമളാൻ രാവുകളിൽ തറാവീഹ് നിസ്കാരം നിലനിർത്തുന്നതിന് വേണ്ടി ഉമർ (റ)ഉത്തരവിട്ടതായി ഇമാം മസ്ഊദി(റ)യുടെ മുറൂജുദ്ധഹബ്‌ വാ: 2 പേ:328 ൽ പ്രസ്താവിച്ചിട്ടുണ്ട്.

ഇമാം അബുല്ലൈസിസ്സമർഖന്ദി(റ) അലിയ്യുബ്നു അബീ താലിബ് (റ) ൽ നിന്ന് നിവേദനം. " നിശ്ചയം _(ഉമർ(റ) ഒരു ഇമാമിന്റെ പിന്നിൽ ഒറ്റ ജമാഅത്തായി സംഘടിപ്പിച്ച)_  ഈ *തറാവീഹ്* നിസ്കാരത്തിന് അവലംബം എന്നിൽ നിന്ന് കേട്ട ഹദീസ് ആയിരുന്നു .ഞാൻ നബി(സ) യിൽ നിന്ന് കേട്ടതാണ് പ്രസ്തുത ഹദീസ് " (തൻബീഹുസ്സമർഖന്ദി പേ:124 )

സ്വഹാബത്തിന്റെ കാലത്തു തന്നെ തറാവീഹ് എന്ന നാമം പ്രസിദ്ധമായിരുന്നുവെന്നു അലിയ്യുബ്നു അബീ താലിബ് (റ)ന്റെ ഈ വാക്കു കുറിക്കുന്നത് . പക്ഷെ വഹാബികൾ  ഇവിടെ പുറംതിരിഞ്ഞു നിൽക്കുന്നു.

ഇമാം ബുഖാരി(റ)യാണ് തറാവീഹ് എന്ന പേര് കൊണ്ടുവന്നതെന്ന് ഇവർ ആരോപിക്കുന്നു. ഇമാം ബുഖാരി(റ)ക്ക് ശേഷം പിൽക്കാല പണ്ഡിതന്മാരാണ് ഈ നാമകരണം ചെയ്തതെന്നാണ് മറ്റു ചിലരുടെ പക്ഷം.
ഒരു *വഹാബി എഴുതുന്നു* " പരിശുദ്ധ ഖുർആനിലോ തിരുസുന്നത്തിലോ തറാവീഹ്എന്ന പദം പ്രയോഗിച്ചു കാണാത്തതിനാൽ *ഈ പദപ്രയോഗം പിൽക്കാലത്തു വന്നതാണെന്നും അനുമാനിക്കാം* "' (അൽമനാർ പേ:50 1984 ജൂൺ )   




📖പുസ്തകം: ഫതാവാ മുഹിയുസ്സുന്ന
📓ഗ്രന്ഥകർത്താവ് :പൊന്മള അബ്ദുൽ ഖാദിർ മുസ്‌ലിയാർ
©പ്രസാധനം: മുഹ്‌യിസ്സുന്ന ബുക്ക്സ്. ചെമ്മാട്
📚ഭാഗം ഒന്ന് .മൂന്നാം പതിപ്പ്. പേജ്: 131-132 
✒പകർത്തിയെഴുതിയത് : സ്വാബിർ പൂനൂർ